aIbr 9:4
bYo 1:14; Tur 15:8
cKam 13:21; Mt 28:20; 1Kor 10:1

Exodus 40

Zin Israel tipamender beeze potomŋana ki Merere

1To Yooba iso pa Mose ta kembei. Iso: 2“Aigule mataana kana ki puulu mataana kana isombe ipet, to pamender beeze potomŋana tabe iwe muriŋ i, bekena itiŋan tuluplup ti lela. Kam ta kembei: 3Sua Mbukŋana Ka Koror tabe tutu tio imbotmbot sula leleene na, kozo ur lela beeze muŋgu, to daada kawaala biibi be isekaala. Pa koror tana, ina potomŋana kat.

4“To kam mbalia tabe narabu potomŋana imbot se na, mi ur lela beeze leleene biibi ta imbot pet ki mat na, mi ŋgas narabu potomŋana ise.

“To ur koroŋ tabe iur mat pa ruumu i ma ilela. Mi kam ka lam lamata mi ru mi ur la murinmurin.

5“To kam you muriini tabe tirukruk ŋgere kuziiniŋana se na, mi ur su kolouŋana pa Sua Mbukŋana Ka Koror tabe tutu tio imbotmbot sula leleene na. Imbot pet ki mat. Mburu ta beeze leleene kana i ilela makiŋ, to daada kawaala biibi be isekaala beeze kwoono.

6“To ur patoronŋana muriini ila beeze kwoono, 7mi ur timbiiri biibi ta yok imbotmbot pa na, ma ila isu lukutuunu pa patoronŋana muriini mi beeze. 8To urpe beeze zilŋaana, mi pamender siiri ma ipapiliu beeze. Mi daada kawaala biibi ta mbolŋana na, ma ila siiri kwoono be isekaala.

9“Sombe kam uraata ta boozomen tana ma imap, to kam ŋgere kuziiniŋana ma liŋ sala beeze tana ramaki ka mburu boozomen ta timbotmbot leleene na, bekena ur zin ma tiwe leŋ. Naso tiwe potomŋan. 10“To liŋ ŋgere isala patoronŋana muriini ramaki ka mburu mi timbiiri biibi bekena ur zin ma tiwe leŋ. Patoronŋana muriini tana na, koroŋ potomŋana kat.

12“Uraata boozomen tana imap lup, tona kam Aron ziŋan lutuunu bizin tomooto ma timar kolouŋana pa beeze kwoono, mi ri zin pa yok. 13Ri zin makiŋ, to zeebe Aron pa mburu kini potomŋana, mi liŋ ŋgere isala uteene bekena uri ma iwe leŋ, mibe ikamam patoronŋana pio. 14To kam lutuunu bizin ma timar, mi zeebe zin pa mburu kizin, 15mi liŋ ŋgere isala uten tomini kembei ta kam pa taman na. Naso ur zin tomini ma tiwe leŋ be tikamam patoronŋana pio. Ziŋan popoŋana kizin tabe tipet pa kaimer i, ko titekteege uraata tana, mi iseeŋge iseeŋge ma ila.”

16Yooba iposop sua kini tana, to Mose ila ma imaŋga pa ka uraata. Ikam koroŋ ta boozomen raraate kembei ta Yooba iso pini na. Ito kat. 17Tana indeeŋe zin Israel pai kizin ikam ndaama ta ma imap, mi puulu mataana kana ki ndaama popoŋana ka aigule mataana kana ipet, to tipamender beeze potomŋana ki Yooba. 18Tipamender nasil, gungun, mbal, siel, mi ka koroŋŋanŋan ta boozomen, to tipeele kawaala bibip pakan isala kor. Tana tikam raraate kembei ta Yooba iso na.

20To Mose ikam pat ru ta tutu ki Yooba imbot se na, mi iur zin lela Sua Mbukŋana Ka Koror. Pat ru tana be ipombol zin Israel ma matan iŋgalŋgal sua ta ziŋan Yooba timbuk na. Mi Mose iur koror ka siŋ ru ma tiloondo pa sumbun bekena tiziŋziŋ pa. To ipakaala kwoono. Koror kwoono tana, ina tiwatwaata be ‘sanaana reegeŋana muriini.’ a

21Tona iur Sua Mbukŋana Ka Koror tana ilela beeze leleene, mi idaada kawaala biibi ma ise ipakaala. Ikam raraate kembei ta Yooba iso pini na.

22Tona iur mbalia narabu kana ilela beeze leleene biibi ta imbot pet ki mat na. Ila zilŋaana ta imbot la namaana woono na. Mi iŋgas narabu ma isala, bekena imbot la Yooba kereene uunu. Ikam raraate kembei ta Yooba iso pini na.

24To iur koroŋ tabe iur mat pa ruumu leleene i ma ilela beeze leleene biibi. Ina ila zilŋaana ta imbot la ki ŋas na.

25Mi iur ka lam lamata mi ru ila murinmurin be tiyaara ila Yooba kereene uunu. Tana ikam raraate kembei ta Yooba iso na.

26To iur you muriini tabe tirukruk ŋgere kuziiniŋana ise na, ma ila kolouŋana pa kawaala ta isekaala beeze leleene ta potomŋana kat i. 27Mi iruk ŋgere kuziiniŋana isala. Ikam raraate kembei ta Yooba iso pini na.

28Mose iurpe beeze ramaki ka mburu leleene kana makiŋ, to idaada kawaala biibi ma ipakaala beeze kwoono, mi imaŋga pa uraata mat kana. 29Iurpe patoronŋana muriini ma imbot mat pa beeze kwoono, mi iur mbili mi kini wit pakan isala, mi ineene ma imap bekena iwe patoronŋana. Ikam raraate kembei ta Yooba iso na. 30To iur timbiiri biibi isu lukutuunu pa beeze kwoono mi patoronŋana muriini, mi ise yok isula. Beso ni, som Aron, som Aron lutuunu bizin tilela beeze, som tigarau pa patoronŋana muriini, to tiŋguuru naman ma kumbun pa yok tana. Ikam uraata tana makiŋ, to iurpe beeze zilŋaana, mi ipamender siiri ma ipapiliu, mi idaada kawaala biibi ila siiri kwoono bekena ipakaala.

Tana uraata boozomen ta Yooba iso pini be ikam na, Mose ikam ma imap.

Yooba iswe azuŋka kini bekena zin Israel tiute: Ni ziŋan timbotmbot

34Tikam uraata tana makiŋ, to miiri tieene tau, isu ma ilol beeze tana, mi Yooba iswe azuŋka kini ma iyaara lela ma biibi. Tabe ikam ma Mose irao be ilela som. Pa miiri tieene tana mi azuŋka ki Yooba na, mburaana biibi mete. b

36Indeeŋe zin Israel tiwwa pa lele bilimŋana na, matan ilala pa miiri tieene men tau. Sombe izem beeze mi isala ma ila pa lele toro, to zin tomini timaŋga ma tilek mburu kizin, mi tito miiri tieene tana. Mi sombe imbotmbot men sala beeze uteene, na zin timaŋga som. Timbotmbot mi tizza. Beso miiri tieene ipa mini, to timaŋga ma tila. Tana miiri tieene ta ipatoŋtooŋo zin pa zaala.

38Tana indeeŋe tau zin Israel tiwwa pa lele bilimŋana, mi ila irao tipet toono Kanaan na, tirre la pa miiri tieene ta imbotmbot sala beeze potomŋana pa aigule. Mi mbeŋ na, tirre la pa you miaana ta iyaryaara. Tana zin tiute kat ta kembei: Yooba, ni ziŋan timbotmbot. c

Copyright information for MNA